中環出更：胡志偉慘吞樹根九蛋
泛民議員早前講明在議會內進行全面不合作運動，但勢估唔到唔止對外不合作，連對內都唔係好合作。話說尋日立法會房屋事務委員會選舉副主席，候選人係民建聯鍾樹根同埋民主黨胡志偉，點知胡志偉自己都唔知「被提名」，結果最終以直落九比零輸畀鍾樹根，認真誇張。
房屋事務委員會有廿二位成員，泛民同建制各有十一人，尋日有兩位建制派缺席，如果泛民全數動員，想搶贏副主席唔係大問題。點知尋日開會時一位泛民都唔見，結果九位出席議員在五分鐘內投晒票畀鍾樹根，極速送九隻大蛋畀胡志偉。
被提名副主席 自己都唔知
胡志偉事後話，自己完全唔知道「被提名」，又話自從泛民宣布不合作運動後，已有共識唔會競爭所有副主席，任由建制派贏晒。咁邊位提名胡志偉？原來係公民黨梁家傑。至於贏到開巷的鍾樹根就話，估唔到贏咁多，多謝泛民承讓喎。今次再次印證，泛民最大敵人係自己，唔係建制派囉！
卓妮