中環出更：飛船爆炸 名人聞太空遊怕怕
太空遊刺激度爆燈，不過日前一艘載人商用太空船出師未捷，爆炸解體，嚇到想報名嘅富豪急煞停。保良局前日喺沙田馬場舉行紀念盃賽，多位董事局及城中名人現身支持。講到太空飛船載人不成反變死亡陷阱，個個都話命仔緊要，就算飛天可圓太空夢，都係咪搞。
仁濟醫院董事局前主席李文斌話，上太空玩，最多咪睇到幾粒星星，命仔緊要，就算有得報名佢都無興趣。馬會大董陳南祿亦耍手擰頭，笑稱地下都未行完，更何況上太空？莎莎太子女郭詩慧都係安全第一，話依家去旅行都會帶囝囝喺身邊，如果上太空咁多未知因素，佢當然唔想個仔陪住冒險咁話。
不過心口寫個勇字嘅大有人在。保良局前主席鄭錦鐘（Eric）笑笑口話未驚過，仲話以前啲人連坐飛機都話唔安全，依家咪一樣四圍飛。佢認為科技日新月異，終有一天會搵到安全嘅升空方法，到時一定會約埋太太一齊感受喺太空任我行嘅無重狀態喎！
陳正欣：商界恐爆「棄港潮」
保良局總理陳正欣（Daniel）都有入場，講起零售市道受佔領行動重創，經營鐘錶及時裝生意嘅Daniel大嘆無奈。佢話，香港營商環境一向好穩定，無諗過一場佔領令商界信心跌至低點。陳正欣話，有商家朋友感嘆香港營商遊戲規則已被破壞，風氣持續下去，恐引發轉投亞洲其他國家嘅「棄港潮」。
卓妮