佔中搞到香港立立亂，市民飽受滋擾，商戶更加係叫苦連天，近排仲衰多二錢添，內地入口嘅貨物經常失驚無神斷貨，搞到生意大跌不特止，連客戶都流失埋，簡直雪上加霜。
係咁嘅，深圳灣口岸今年九月起實施新過關措施，唔止手續繁複，而且頻頻扣查貨車，搞到亂晒大龍，本港唔少行業受到影響，首當其衝係售賣內地電子產品同配件嘅商戶，因為網購貨物嚴重延誤，生意大受衝擊，唔激氣就假。
好似有位灣仔電腦商場嘅店主咁吖，試過貨物被內地海關扣查個幾月，甚至要打回頭，你話點做生意吖？以前從落單到交貨，兩三日就搞掂，家陣最少要兩個星期至一個月，商戶除咗望天打卦，根本束手無策。十月本來係旺季，因為受到佔領行動影響，商場人流已經大減，家陣再畀內地海關搞一搞，旺季變淡季，生意比舊年同期少咗一半有多，問你點頂!
係人都知，時間就係金錢，做生意最緊要貨如輪轉，尤其係電子產品更新換代好快，過時就會貶值o架。時裝業亦一樣，今次同樣淪為深圳灣「塞關」重災區。有時裝批發店老闆投訴，以前一年至扣貨檢查一、兩次，而今年十月已經畀人查車十次，唔少客戶因為貨遲而取消訂單，損失慘重。中小企團體負責人擔心，如果扣關潮持續，影響擴散到其他行業，造成嘅損失更加難以計數。
最無奈嘅係，港商對內地政策只能夠「查詢」，唔能夠「投訴」，焗住要硬食，根本冇可能知道內地當局幾時至肯改善過關措施。其實，除咗扣車查貨，運輸業界人士亦批評新報關制度手續繁複，填寫內容由以往嘅四項增加到二十幾項，費時失事，煩到抽筋。
講開又開，呢次塞關話就話係內地新措施引起，但唔係完全唔關港府事o架，為港商排憂解難係當局不可推卸嘅責任，點可以置身事外，闊佬懶理。好簡單，中港兩地有溝通機制，粵港聯席會議更加係年年舉行，港府完全可以同內地有關部門協調，諗辦法簡化手續，減少不必要嘅扣查，令兩地物流回復正常，咁對大家都有好處吖，係咪？
講到底，一切事在人為，關鍵係當局肯唔肯做啫。港產官僚一向講多過做，好似前幾年內地調整政策，珠三角大批港商受到影響，求助無門，而港府只係循例表示「密切關注」喎。今時今日，香港正處於多事之秋，喺政治狂熱尤其係佔中行動之下，營商環境不斷惡化，如果港產官僚仲係袖手旁觀，見死不救，一旦將小商戶逼上梁山，香港盞亂上加亂嘅咋！