政情：方剛 鍾國斌鬥推莊
全國政協常委會以高票通過褫奪自由黨田北俊（田少）嘅政協委員資格，令田少要急急辭去黨魁一職，就如切割癌腫瘤咁避免禍及黨身上。目前唔少人都估緊由邊個接任黨魁職務，熱門人選有紡織及製衣界議員鍾國斌及批發零售界方剛，但係兩人卻互相推莊，異口同聲話對方先至係最佳人選。有知情人士話，實情係無論邊個做黨魁都好，最後都係田少喺幕後發功，垂簾聽政。
隨時殺出林大輝
田少前日辭任黨魁後，已經明言唔想元老級人士接手，話屬意由「中生代」接任黨魁，大家即刻將焦點轉移去鍾國斌身上，因為黨內兩大元老包括方剛及飲食界張宇人，其實都無乜興趣接手，加上年紀都有番咁上下，如果接手實在不利黨內接班，搞到青黃不接就大件事，所以寧願將重任交託畀後生仔好過。
點知鍾國斌尋日話自己資歷尚淺，難以勝任黨魁一職，仲反建議方剛先係最佳人選喎。正當兩人互推時，有心水清嘅人就叫大家留意，話該黨黨魁唔一定由兩人接任，其實仲有其他人士有機會。咁到底係邊個呢？其實同田少相熟，又唔算太老嘅議員唔多，佢就係遲遲都唔肯入黨嘅工業界林大輝。
有立法會議員透露，呢一兩日田少成日搵大輝密斟，似乎有意喺呢個時候叫大輝「接管」自由黨，如果真係成事，咁大輝當然順理成章做埋黨魁啦！不過，世事又未必咁完美，因為該黨唔少人都視田少為偶像，但就未必視大輝為偶像嘞，所以大輝要過到黨內一眾反對聲音至得。我哋尋日就分別問過兩人回應，但直至截稿前都未有任何答案，更令人懷疑呢場「田林配」係咪密謀成事。
田玩辭職有前科
話時話，其實田少辭職可以話係重施故技，佢喺○八年立法會選舉失利，已經即時辭去黨主席職務，當時該黨喺立法會內得番三票，主席改由劉健儀出任，捱過四年悲情歲月。當時田少自稱係普通黨員，但佢仍然喺背後指點江山，今次佢辭去黨魁一職，又會否好似當年咁繼續喺背後參與黨務呢？