政情：不滿主席裁決 發「彪」掟咪
立法會尋日續會，首先處理對《議事規則》中一項關於點算法定人數嘅技術性修訂，原本呢項議案都無乜爭議性，但勞工界議員鄧家彪（Bill）發言時就借勢批評泛民主派議員經常以點算開會法定人數呢招嚟「拉布」，但係阿Bill就被主席曾鈺成裁定發言與議案內容無關，搞到阿Bill嬲到要掟咪話唔再發言。
討論議案發言被指離題
阿Bill發言時批評有「拉布」議員成日濫用《議事規則》亂點人數，又話根據英國議會模式，唔係所有法案都要經全體委員會審議，但就被曾鈺成裁定發言內容離題，要求佢停止發言。阿Bill即時駁嘴，話主席前日都容許「拉布」議員發言離題萬丈，尋日就唔准佢發表個人意見，之後仲發晦氣咁拋下一句「我唔講喇」，掟低個咪停止發言。
經修改嘅《議事規則》訂明，一旦有議員喺委員會審議階段要求點算法定人數，而過咗十五分鐘法定時間都未齊人，主席可以直接宣布流會，而唔使回復立法會大會階段再點一次人數，變相慳番十五分鐘點算法定人數時間。