政情：啟剛入中出 冇諗過從政
香港五大商會之一嘅中華出入口商會（中出）今年成立六十周年，一連串慶祝活動陸續登場，其中首屆舉辦嘅「進出口企業大獎」尋日喺灣仔會展舉行頒獎典禮，政商界人士齊齊去見證開心時刻。啱啱加入中出即當選常務會董嘅霍英東家族長孫霍啟剛亦有到場，對於外界猜測佢入中出係鋪路從政，啟剛澄清話完全冇諗過，加入中出都係為咗服務社會咁話。
早前中出進行改選，其中以啟剛最引人關注，外界揣測佢或有意從政，係想填補霍家在其父親霍震霆卸下立法會議員後日漸式微嘅政治影響力。不過，啟剛強調，中出有好多青聯人，例如進出口界立法會議員黃定光及中出副會長許華傑（Michael）都做過青聯主席，所以佢入中出係好正常喎！咁邊個叫佢加入？啟剛就笑而不答喇！
許華傑辦評選「取經」
講番頒獎典禮，新當選會長嘅副會長張學修及現任會長莊成鑫都忙於招呼賓客。Michael係活動籌委會召集人，佢笑笑口話，今次係以個人立場去催生呢個獎項，事關佢接手家族紡織生意後，同好多第二、三代一樣覺得好難做，曾經諗過不如收吓租、賺吓快錢好過，佢好想聽吓人哋點做，於是決定用評選方式發掘成功故事。
今次共有十四間企業獲獎，包括「家電大佬」陳國民掌舵嘅德國寶、從事中藥業生意嘅泉昌有限公司、四洲貿易有限公司及冠華食品菓子廠等，Michael希望獎項可以繼續舉辦下去。