唔知大家記唔記得，早排有大埔街坊不滿領匯以「優化」為名瘋狂加租，逼走小型食肆，因此發起「餓爆領匯」嘅杯葛行動。其實家陣地產獨大，點止小商戶捱唔住貴租吖，公營機構一樣頂唔順要執包袱走人嘅咋，問你服未！
唔係亂噏o架。位於觀塘樂華商場嘅郵政局服務居民幾十年，居然不敵租金壓力，計劃明年租約期滿後結束運作，改用流動郵車提供服務。雖然街坊可以去附近嘅牛頭角安基苑郵局，但兩間郵局一間喺山上一間喺山下，而使用郵局服務嘅多數係公公婆婆，要佢哋走上走落，好唔合理啫。
老實講，領匯加租勢兇夾狼，固然搞到商戶怨聲載道，但郵局長期虧損，就算唔加租，都唔捱得幾耐。鬼咩，呢間郵局平均每日服務二百八十個顧客咁大把，遠少於其他規模相若嘅郵局，過去三年每年平均蝕超過一百萬元，想唔執笠都幾難喇。
本來呢，在商言商，做生意無利可圖，摺埋都無可厚非，問題係郵政始終係公共服務，點都要照顧公眾利益嘅。再講吖，目前全港一百二十五間郵局同兩間流動郵局裏面，約一百間錄得營運虧損，而香港郵政自九五年改以基金模式運作，自負盈虧，經營狀況持續惡化，每年虧蝕億億聲，照咁睇，豈不是遲早要全線結業？一個所謂國際大都市，如果連郵政咁基本嘅服務都冇，你話係咪國際笑話吖？
可能有人會問，摺又唔摺得，蝕又蝕唔起，呢個困局點拆先？嗱，辦法唔係冇，問題係當局有冇決心解決啫。冇錯，今時今日莫講話寫信，好多人連電郵都嫌麻煩，淨係篤吓手機發短訊就算，傳統郵遞需求的確愈來愈少。不過咁喎，有危就有機，潮流興網購，速遞行業商機無限，香港郵政話就話有速遞服務，但收費高昂效率低下，生意一直麻麻。正如業界人士話齋，香港郵政零售點多，有先天競爭優勢，可以考慮同物流公司合作，騰出地方做物流點，唔係冇得搞0架。
正所謂他山之石，可以攻玉，港產官僚自己諗唔掂，咪向人哋偷師囉。好似新加坡郵政咁吖，推出廿四小時免費自助包裹站服務，方便市民隨時領取包裹，都唔知幾受歡迎。仲有吖，市民喺網站訂購商品後，亦可以要求郵局送到包裹站，呢啲貼心服務成功留住顧客，點解香港郵政唔學吓呢。
一句講晒，窮則變，變則通。做人又好，施政又好，最緊要與時並進，靈活變通，港產官僚一本通書睇到老，梗係問題多多、一事無成喇！