渡海濠情：龍男容易 舊情復熾

第一位：馬男 感情豐富

師傅話屬馬嘅朋友感情豐富，對人友善，就算同情人分手，都會保持朋友關係，對佢哋時刻關注，當你一有事，佢哋會自動請纓，出手相助，所以好易舊情復熾。盈盈話：「我有個姊妹嘅男朋友就係屬馬，兩個讀書時喺埋一齊，畢業後因各自工作而分手，但呢個男仔成日都打電話關心佢，有次我姊妹感情出問題，佢知道後即刻出現噓寒問暖，最後竟重奪我姊妹嘅歡心，之後兩個人再喺埋一齊，所以屬馬嘅前度男友，絕對係吃回頭草嘅最佳達人！」

第二位：豬男 心地善良

屬豬嘅朋友心地善良，心裏面唔敢得失任何人，特別對自己深愛過嘅前任女友就更為重視，甚至一啲傷害過佢哋嘅前度，只要有求於佢哋，屬豬朋友都唔敢說不。盈盈話：「我有個表哥屬豬，真係咁嘅人，佢嘅前女友一腳踏兩船，而且又呃埋佢啲錢，之後就分手。換轉係我，以後都唔會再係朋友啦！但佢哋分手兩年後，有日個前度竟返嚟搵佢，話自己畀男友呃咗，家陣人財兩空，心情十分低落，我表哥竟對佢百般呵護，最後更決定再愛對方一次！」

第三位：龍男 重視舊情

屬龍嘅朋友由於十分重視舊情，屋企裏面一定有好多古老物品，點都唔捨得揼，舊物件都咁重視，舊情人更有一個非常重要嘅位置，所以舊情人提出復合，佢哋好容易就會答應。盈盈話：「我前男友就係屬龍，佢同我拍咗拖兩年，我哋之間關係不知幾咁好，但都唔夠佢嘅前度厲害，佢一出手，就勾咗我男朋友嘅三魂七魄，晚晚接我放工，送我返屋企之後就去陪人哋，我見佢親熱時死蛇爛鱔咁，就知佢有可疑，審問之下，我即時就飛咗佢呀！」

每周 大吉生肖

異性運：牛、蛇、馬

桃花運：虎、羊

和合運：龍、雞、狗

撰文：小德

攝影：阿德

玄學提供：寶源師傅