鄉局訪軍營 不談政治

佔領行動持續咗十幾日，就喺呢個敏感時刻，新界鄉議局主席劉皇發（發叔）尋日突然拉隊去石崗軍營，慰問解放軍駐港部隊及探訪軍營，莫非將會有事發生？非也！據知今次活動係「純玩」，不談政治。尋日有份去軍營參觀的包括應新界二十七鄉鄉事委員會邀請的五、六百名鄉紳，除咗發叔之外，仲有鄉議局副主席張學明、十八鄉鄉委會主席梁福元等人。聽聞節目內容有解放軍步操表演、自由搏擊同攀登等戰術表演，新界人就表演舞龍舞獅作為回禮。梁福元話，今次會面不談政治，亦冇特別討論佔領行動，但發叔喺講開場白時，重申咗反佔中立場喎！