有時一啲專有名詞應音譯定意譯都會引起爭議，立法會議員譚耀宗（譚Sir）前日都被一個翻譯名詞難倒。
話說譚Sir以議事規則委員會主席身份向內務委員會提交報告，佢一時就話立法會有關點算人數嘅規定係採取「威斯敏特斯」嘅議會模式，一時又話係「威斯敏斯特」，真係聽嗰個都戥佢辛苦。最慘係講到一舊舊不特止，仲要被泛民主派議員寸佢將啲用開嘅翻譯字眼「大陸化」，唔知佢講咩喎。
雖然秘書長陳維安已解釋譚Sir讀嘅「威斯敏斯特」係秘書處用嘅正式譯名，但議員梁國雄依然話唔知譚Sir講咩，有議員更加話「Westminster」一個世紀以嚟中文都叫「西敏寺」，叫譚Sir唔好將用開嘅翻譯字眼「大陸化」，仲誇張地批評譚Sir「侮辱」香港沿用嘅中文喎。議員陳偉業就建議用番「西敏寺」呢個譯法。估唔啲議員連呢啲雞毛蒜皮嘅嘢都拗，唔怪得啲會議開極都唔完嘞。