佔中大會手語 「香港」錯譯「麵包」
佔領行動持續，大批市民在金鐘集會，為咗方便聾啞人士理解，佔中大會就搵來工作人員示範做出「愛與和平佔領香港」手勢，點知有讀者好眼利，話睇新聞片段發現工作人員做錯手語，將代表「香港」嘅手語，錯誤做咗「麵包」，加上動作嘅偏差，最終變成「愛與和平固定麵包」。
做咗相反動作
我哋請教身兼手語翻譯員嘅龍耳創辦人邵日贊，佢話手語示範的確做錯咗。
邵日贊解釋，代表「香港」嘅手語係將手指聚集一齊形成Ｏ字，放喺嘴前面，手指向外彈開兩次。代表「麵包」嘅動作則啱啱相反，係手指張開並放喺嘴前面，再向內收緊兩次，就好似揸緊鬆軟嘅物件咁。佢又話，意指「佔領」嘅手語動作都有偏差，做錯咗代表「固定」嘅動作。
據了解，當晚喺台上示範嘅係司儀，而非手語翻譯員，臨急臨忙要用腦袋配合手姿學手語，係要相當時間消化，搞錯咗都情有可原嘅。