「迫遷」公僕 樂不返政總
佔領行動令位於金鐘添馬艦嘅政府總部遭受堵塞，政府一度啟動應變計劃，包括讓部分高官、特別係主管財金部門嘅官員「轉場」到位於中環舊政府總部、即中區政府合署西座辦公。不過，隨住近日示威者陸續減少，官員同公務員亦陸續可以返回政總返工喇，但有「移師」咗舊政總返工嘅官員就睇啱中環因為受佔領影響，環境清靜，連食晏都方便過人，因而唔想搬返金鐘政總咁話。
多屬財金官員
受到佔領行動影響，政府實施連串應變計劃，除咗行政會議及政府高層會議要改到禮賓府召開外，部分高官及決策局人員亦改往其他政府建築物辦公。據了解，財政司司長辦公室、財經事務及庫務局局長陳家強，及其他與金融經濟相關嘅部門就移師到中環舊政總辦公。
不過，近日佔領示威者漸趨平靜，唔少公務員都回歸金鐘政總辦公喇，但有返咗舊政總返工嘅政府中人就「樂而忘返」，唔多願意返回金鐘政總。原來唔少公務員都曾經喺舊政總返過工，返開有感情。舊政總本身又應有盡有，依家得幾個部門喺度辦公，地方仲寬敞啲，而且亦唔使好似喺金鐘咁，出入要面對示威者。
此外，因為受佔領行動堵路影響，平時人多車多嘅中環近日車又少咗，空氣又清新咗，條路又闊咗，就連食晏都冇平時咁多人，等位唔使等咁耐，加上離開政總，可謂山高皇帝遠，有邊個打工仔唔想冇王管？
新聞處更清幽
講開又講，當其他政府人員正愁緊要返金鐘政總之際，位於上環海港政府大樓嘅政府新聞處人員就免卻咗呢個煩惱。當初新聞處中人仲埋怨辦公地方離金鐘太遠，做起嘢上嚟唔係咁方便，依家佢哋反而因為獨處一角，樂得清靜，就算金鐘政總被圍堵，新聞發布都不受影響。睇嚟今次真係錯有錯着喇。