政情：江素惠籲學生勿叫價太高
佔中示威爭拗沒完沒了，日前學生與政府會談告吹，身在香港多年嘅台灣人江素惠都憂心忡忡。前日佢出席一個酒會時大講農夫插秧嘅道理，寄語學生同政府都要各退一步，事情先有轉機咁話。
以農夫作喻 「插秧要識退」
身為香江文化交流基金會主席嘅江素惠話，插過秧嘅人都知道，插秧時要一直往後退，否則無空間播種。當你識得一路後退一路插秧，回頭一看，滿田就已插晒秧。佢仲話，佔中多日，示威者嘅聲音佢聽得清清楚楚，事關佢公司喺金鐘，望出窗外就係示威區，睇見示威者堵路多日，市民怨聲載道，江素惠都話期望佔中盡快完結。
佢勸示威學生唔好叫價太高：「學生要明白談判對象係北京，唔係香港人，叫價太高，就失去談判空間。」佢咁語重心長，無非想話畀大家知，退一步海闊天空，希望政府同學生可以共創雙贏喎！