中環出更：慈善演唱 小吉「立」功
為內地偏遠貧困地區白內障患者免費提供手術治療的健康快車，早前在君悅酒店舉行年度籌款晚宴，中港政商界名人齊現身共襄善舉。正享受退休前休假的民政事務局前常任秘書長楊立門（Raymond）同太太拍拖到場，好唱得的Raymond唔單止喺晚宴壓軸獻唱，博得滿堂喝采，佢仲應承明年三月舉行個人演唱會為健康快車籌款添！
邊個咁有牙力請到Raymond開個唱？咪健康快車創會主席方黃吉雯（小吉）囉！小吉話，早前佢親自邀請Raymond開金口幫手籌款，雖然Raymond未過一年「離職冷河期」，但做善事就冇問題，所以一口就應承咗。
張怡寧帶囡囡現身
小吉對呢場演唱會好重視，仲安排專業團隊合作，可以話係度身訂造演唱會，相信到時不乏政商界捧場客。
當晚到場嘉賓多不勝數，仲有國寶級乒乓球奧運冠軍張怡寧及女兒、財經事務及庫務局常任秘書長區璟智與丈夫等人。卓妮見張怡寧囡囡生得好標致，問佢會否教囡囡打乒乓波？張怡寧就笑笑口話，囡囡仲細，等佢長大啲先啦！
區璟智就嚟退休，心情好輕鬆，佢話退休後唔會再做嘢，得閒遊吓埠、做吓義工好過。講起最近佔領行動令一眾高官出入唔方便，區璟智就話，自己要經常喺政總及ifc兩邊走，所以索性行過去，呢排行得多，相信都Fit咗唔少喎！
卓妮