隨着金鐘海富中心通往政府總部嘅行人天橋重新開通，公務員可以經天橋行過政總返工，過去兩日仲開始見到政府官員行過，佢哋一出現自然成為追訪嘅對象。尋日財經事務及庫務局常任秘書長謝曼怡行經天橋，面對記者提出嘅問題，佢一概冇回應，淨係拋低一句「唔該畀條路嚟行吓」，然後急急行入政總。佢呢句說話係咪好熟口面呢？咪就係出自民政事務總署年前拍嘅廣告囉，署方呼籲店舖唔好阻街，將啲貨擺番入啲，還路於民。謝曼怡免費幫手宣傳，民政事務總署係咪應該多謝吓佢呢？
