一邊鬧背信 一邊鬧跋扈
建制派尋日朝早召開秘密會議商討對策，決定只係將衞生同福利事務委員會分別讓路畀衞生服務界李國麟及社福界張國柱兩名泛民議員，其餘十六個事務委員會嘅正副主席職位將會搶到盡。議員蔣麗芸（Ann）開會後率先開火鬧爆泛民背信棄義，破壞行之有效嘅協調機制。
不過，飯盒會召集人梁家傑就反駁話，雙方原本協議所有委員會正副主席「一人一半」，但建制派成日恃住人多蝦人少，搶盡大部分委員會話事權，所以泛民必定寸步不讓。被指在協調上失職嘅葉國謙透露，建制派會繼續要求加入兩個小組委員會，如果泛民真係拒絕，佢哋會要求財務委員會介入事件，咁就一定可以穩操勝券喎。