政情：立會恐演「佔中屠城記」
佔領行動近日已陸續有散水迹象，但連日「佔領」立法會大樓多層會議室嘅示威者完全無離開意願，甚至傳聞有泛民主派議員離譜到將立法會變成「佔中總部」，指揮整個佔領行動。立法會行政管理委員會（行管會）尋日召開特別會議，初步決定下周三恢復大會，但有建制派議員擔心，如果身在大樓內嘅示威者在開會期間衝入會議廳佔領立法會，上演一場現代版「木馬屠城記」，後果不堪設想。
自從佔領行動開展以來，包括社民連「長毛」梁國雄在內嘅泛民議員紛紛濫用議會特權長期借用立法會大樓各層會議室，等示威者可以入內屈蛇瞓覺休息。有示威者甚至買定大堆食物擺在各樓層雪櫃，又帶埋攬枕同薄被，十足攞正牌咁款。建制派得悉事件後紛紛向秘書處投訴，議員葉劉淑儀更加去信立法會主席曾鈺成，要求秘書處正視問題，唔好將立法會當成旅館或隨意借宿嘅客棧。
「單靠保安未必能應付」
雖然建制派連番投訴，但泛民依然理直氣壯覺得外借地方無問題，死撐話示威者只係廿四小時在立法會開會，傾到攰時就「攤抖」吓啫，無違立法會規定。不過，有建制派議員在尋日行管會會議上反映，擔心如果示威者在立法會持續留宿到下星期三，再喺開大會嗰陣衝入會議廳示威，甚至好似台灣佔領立法院咁佔領立法會，單靠保安未必足以應付，屆時可能又要警方入內執法。
行管會委員黃定光（象哥）更批評，示威者入立法會開會討論佔中已經好有問題，仲要在會議室瞓晒係度，成何體統。佢又話，由於示威者依家可以憑訪客證隨意出入立法會，如果佢哋喺下周三開會時衝落會議廳示威，或同外面嘅示威者來個裏應外合，耍手段放出面啲示威者入去增援，只會重演「木馬屠城記」嘅悲劇，由佔領金鐘變成佔領立法會。
「議員要為訪客行為負責」
曾鈺成在行管會會議後話，由於依家啲訪客守則無列明訪客離開立法會嘅時限，加上各樓層會議室理論上二十四小時開放，只要議員跟足程序申請，秘書處無理由拒絕。不過，佢無正面回應立法會有無足夠保安處理大樓內所有示威行為，只係話議員要為訪客嘅行為負責，行管會下周一會再開會討論事件。