政情：梁繼昌「好等錢使」 兌換銀仔
自從電子貨幣普及後，零碎嘅硬幣用途已開始減少，為解決市民日積月累嘅硬幣，金融管理局由本周一開始推行硬幣收集計劃，派出兩架收銀車去全港十八區收集硬幣。聽聞計劃深受市民歡迎，以牛頭角為例，收銀車短短兩日就收到一百萬元。立法會會計界議員梁繼昌（Kenneth）尋日都去咗牛頭角湊熱鬧，仲帶咗一大盒硬幣換埋一份，仲講笑話自己好等錢使。
捐畀慈善機構
Kenneth盒硬幣除咗港幣外，仲有澳門、澳洲、歐洲等外幣。佢話，平日着西裝，唔方便帶咁多硬幣在身，通常會用電子貨幣畀錢，加上去旅行後剩低唔少其他國家嘅硬幣，儲吓儲吓就一大盒。Kenneth今次合共換咗一百五十七點八元，佢將齊頭捐晒畀慈善機構，剩餘八毫子就入咗八達通。由於部數硬幣機只能識別港幣，所以佢啲外幣就恕不受理，惟有留番下次去旅行用喇！