中環出更：「智」創點畫 培養耐性紀律
時下好多年輕人生活態度散漫、欠缺紀律，唔少家長都讓子女參加青少年服務團體，以培養積極嘅人生觀。第一屆香港青年服務領袖獎獎勵計劃日前舉行頒獎禮，在十三個制服團體中評選出十三位得獎者，身兼計劃榮譽創辦人嘅行政會議成員陳智思（Bernard）都有現身支持。
Bernard自爆細個時都幾頑皮，但當時又冇乜青少年制服團體可以參加，後來佢讀大學時自創以塗改液作畫，先至培養出耐性及自律性。佢笑笑口話，初初佢畫一張「點畫」用咗三個月，少啲耐性都唔得，後來佢學精咗，唔再用咁大張畫紙作畫喎！
想大仔入航空青年團
佢認同青少年參加制服團體可以培養紀律性，唔少僱主亦傾向聘用有參加呢類服務團體嘅人，所以家長應該多啲畀子女參與。原本佢都想畀兩名兒子參加，但通常周末都安排晒活動，所以一直未付諸行動。今次活動令佢對十三個制服團體更加了解，Bernard對航空青年團好感興趣，心思思叫十四歲大仔加入添！
獎勵計劃創辦人黃仰芳（Fonia）及聯席創辦人林月萍（Moray）、吳潔純成晚忙出忙入。Fonia話，計劃目的係獎勵及培育熱心服務社會嘅十八至三十歲青年領袖，建立由青年主導、商界支持嘅平台，推動「我話事，共創造」嘅核心文化。Moray就話，今次全靠一班好友義務幫助先能成事，希望獎項可以延續下去，每兩年舉辦一次。
卓妮