政情：公民講場：教聯憂中學生 魚蛋加價都罷課

學民思潮將於今日發動中學生罷課，教聯會主席鄧飛尋日出席電台節目時，大鬧中學生罷課係一場「騙局」。佢又以日前有一間中學學生，因為不滿新校規而發動罷課及佔領操場做例子，擔心罷課風氣會不斷蔓延，將來可能連校內小食部魚蛋加價，學生都會罷課抗議。出席同一節目嘅教協會長馮偉華，就批評鄧飛嘅「騙局」論說法過分。不過從教協並冇明刀明槍力撐中學生罷課，又拒絕發動全港中學教師罷教，可見不論係來自左中右嘅教育界人士，都對心智未必完全成熟嘅中學生罷課有保留。