政情：證券學會會長睇好港股後市
香港股市早排愈升愈有，唔少股民賺到笑，但近排股市又玩變臉，接連跌破幾個心理關口，究竟發生咩事？證券學會會長李細燕尋日出席一間星級食府開幕式時，我哋趁機問吓佢點解，佢就話呢波跌市係因為佔中喎！不過話口未完，佢又話仍然睇好港股後市，因為允許內地散戶投資港股嘅滬港通即將推出。咁又係，大把北水即將南調，港股想跌都唔易。
本身做證券業嘅平和國際集團主席仇詩傑（James），早幾年開始撈過界開埋食肆，炒完股票炒小菜，結果愈做愈順景，眨吓眼已有十間分店。
James尋日出席全港最大一間分店嘅開張儀式時，更透露打算喺明年將食肆上市添！難怪原本各有發展嘅囡囡仇曼瑩及囝囝仇祖薰，都返嚟幫爸爸手做品牌推廣及營運管理。
飲食業界成日呻香港租金貴、人工高，其實只要搵啱條路，仲有大把機會嘅。