政情：尋立會主席接班人
泛民主派揚言於立法會下月復會後展開新一輪不合作運動，立法會主席曾鈺成（阿曾）料要再次出手化解行政立法危機，之不過阿曾早前事先張揚會「裸退」，換言之只會做到二○一六年，立會主席接班人問題遲早要放上議事日程。據聞有關方面初步研判立會接班人難尋，建制派可以勝任人選不出三人，分別係行政會議成員葉劉淑儀（葉太）、立會政制事務委員會主席譚耀宗（譚sir），以及立會內務委員會主席梁君彥（Andrew），之不過三人都各有優劣，誰人可以跑出仍屬未知之數。
建制三人選變數大
立會主席首個熱門接班人選係葉太，佢係立會內少數同時擁有行政及立法經驗嘅議員，佢曾於官場打滾多時，一度出任要處理極多機密資料嘅保安局局長一職，加上同公務員團體關係良好，係政府信得過之人。
葉太其後棄官到外國進修，○八年經地區直選洗禮首次當選，一二年成功連任，其民望一直保持較高水平。但眾所周知，葉太志不在立會主席，有意於政壇更上一層樓，預料呢個將會係接任主席嘅最大變數。
另一可能人選係譚sir，佢係立會內資深議員之一，有足夠江湖地位去應對各種政治挑戰，唯一最大問題係譚sir退意甚濃，即使有黨內兄弟獻計建議譚sir轉換跑道，由現時循新界西參選轉戰俗稱「超級區議會」嘅區議會第二功能界別，之不過呢個方案對建制派無着數，而且損人不利己，可能打亂其他建制派嘅部署。譚sir如果連議員都唔係，出任立會主席更係無從說起。
內會前主席曾倒灶
第三名立會主席接班人選係Andrew，今屆立會選舉係第三次循工業界功能界別成功當選，同時「升呢」出任內會主席後四平八穩，同泛民打交道亦有一手，之不過最大阻力係Andrew非根正苗紅，加上本身係功能界別議員，或者可能會成為泛民攻擊嘅把柄；再者事不離實，Andrew嘅上手、前內會主席劉健儀也一度同立會主席無限接近，最終都係大熱倒灶，擦身而過，歷史包袱或成Andrew上位嘅最大障礙。不過距離一六年立會主席接班仍有兩年多，建制派以上三人誰可笑到最後，仍然變數多多。