中環出更：將軍澳新選區 四方爭霸
選舉管理委員會早前公布區議會選舉選區劃界建議，除咗調整部分選區劃界外，仲新增十九個新選區，當中西貢區就增加軍寶、都善同環保北三個選區，全部位於將軍澳區。據聞西貢區議員方國珊（哪吒）除咗想將本屬自己選區範圍內嘅環保北據為己有外，仲想搶埋附近嘅軍寶區，但民建聯同泛民兩黨都唔想放棄呢舊肥豬肉，令一個小小嘅選區演變成四方之爭。
包括哪吒 民記 泛民兩黨
據地區中人透露，哪吒早已對呢個新選區虎視眈眈，仲派出一個姓黃嘅律師頻頻落區做嘢，擺明係想擴張區內勢力範圍。與此同時，民建聯已經周圍物色人選落區同哪吒盟友對撼，費事畀哪吒攞多一個區。
泛民方面，新民主同盟同民主黨都有意染指該區，雙方原本喺民主動力嘅泛民協調會議時各不相讓，最後新同盟抽籤成功，可以優先派人出選該區。不過有民主黨中人就唔滿意呢個安排，話抽籤一向唔係協調機制之內，要求民主動力重新召開會議討論軍寶呢區畀邊個派人出選。呢個新選區竟然吸引到四方覬覦，睇嚟各黨都始料不及。
卓妮