中環出更：盛智文：許仕仁做我後備
海洋公園前主席盛智文做咗十一年要離開，當然唔捨得，除咗大呻只得三星期通知、走得太急外，尋日出席一個政黨青年團搞嘅歡樂時光派對時又再爆料。佢透露，原來當年政府高層曾經先後六次搵佢做海洋公園主席，話如果佢唔肯做，就會畀前政務司司長許仕仁做喎。
唔想畀許做 寧硬頭皮試
本身經營餐飲業嘅盛智文話，雖然當年政府高層「六顧草廬」搵佢做海洋公園主席，都未能令佢心動，點知該名高官講咗句話「你唔做就可能叫許仕仁做喇」，就令佢即時應承。盛智文講笑話，擔心許仕仁上場後將海洋公園資產賣晒出去，然後用來起樓，所以寧願硬住頭皮試吓都唔想畀許仕仁做喎。
喺酒吧搞得歡樂時光派對，參加者梗係叫番杯酒飲吓啦，但盛智文向來都唔飲酒嘅，尋晚只係以水代酒，所以佢爆料絕對唔係飲大兩杯，係喺清醒情況下講出嚟嘅。
卓妮