政情：鄉事派遇冷待 張曉明呵番
鄉議局尋日喺自己主場為周四出發嘅福建高鐵之旅舉行啟動禮，不但廣邀新界鄉紳出席，連中聯辦主任張曉明同特首梁振英（CY）都畀面撐場，其中張曉明更特登喺儀式舉行前提早抵達鄉議局大樓，同鄉議局主席劉皇發（發叔）等一眾鄉頭閉門會面十五分鐘，之後又主動揮毫題字贈予鄉議局，擺明想「呵」番最近覺得不獲中央重視嘅鄉事派。
閉門會發叔
中央領導人早前南下深圳，輪流向多個建制派政團、社團同商會就政改「宣旨」，但偏偏鄉議局冇份獲邀「領旨」，其後由中央策動嘅「反佔中」大龍鳳，又拉大隊「騎劫」鄉議局主場搞誓師，擺明當班鄉紳「有事鍾無艷，無事夏迎春」。最後搞到八．一七反佔中遊行唔見鄉紳組隊上街，發叔本人更加以健康為理由缺席遊行，張曉明惟有急急補鑊喇。
咁究竟張曉明閂埋門同鄉頭講咗啲乜呢？發叔就話「唔記得晒喇」！唔知佢真係唔記得張曉明講過乜，定係話自己唔會記住之前啲恩仇怨恨呢？