政情：政改喻出驚人

倘無普選 政府淪「空轉引擎」

建制派人士近日空群而出支持政改，范太尋日喺電台節目度繼續撐人大決定，話一七年普選特首絕對唔係終極方案，仲用雀仔比喻政改︰「我哋係咪先攞咗隻雀仔先﹖係唔靚，唔係你想像中嘅五彩雀仔，但係唔靚嘅雀仔你都攞咗先，因為養養吓會變成你鍾意嘅五彩雀仔吖嘛！」而港區人大代表譚惠珠就警告，如果一七年冇得普選特首，立法會「拉布」問題就會持續，政府將無法施政，變成「空轉嘅引擎」咁話。

戴耀廷爆「地溝油菠蘿包」

相信泛民對「養雀」同政府係咪「空轉引擎」都冇咩興趣，事關「佔領中環」發起人戴耀廷就以台灣嘅坑渠油風波做比喻︰「畀個地溝油造嘅菠蘿包你食，你食唔食吖？……我哋要拒絕，必然係否決一個地溝油菠蘿包式嘅方案！」立法會議員李卓人亦都話，接受人大框架下嘅普選有如「食假藥」，又話無論係屆時選出嘅特首定係人大常委會決定下嘅方案都係「爛橙爛香蕉」，泛民必須要否決喎。

雖然大家嘅比喻好生動，但都唔夠吳得掂咁語出驚人。佢尋日出席活動時就叫學生花多少少時間去睇吓人大決定嘅所有內容，又話︰「特別係咁多年都冇（普選特首），今次由冇變有，可以二○一七年一人一票選特首，呢個咁大嘅大躍進，等等嘅改變，從正面角度睇一睇。」吳得掂用「大躍進」來形容政改，雖然可以形容政改有好大嘅進步，但就相當敏感，嚇親唔少網民，仲叫佢讀吓歷史先，唔好講多錯多喎。