中環出更：肥佬黎 李漢奸 Mark Simon 遊艇密會斟拆彈？
壹傳媒老闆肥佬黎被揭秘密捐款嘅醜聞至今逾七星期，周身蟻嘅肥佬黎繼被廉政公署搜屋後，稅務局亦隨即對案件展開調查，佢喺醜聞困擾下多次密會同屬「搞事四人幫」嘅成員，其中同「李漢奸」民主黨創黨主席李柱銘見得最密，至少第八度密會。卓妮尋日再發現肥佬黎密會李漢奸，二人更罕有相約捐款醜聞另一主角、肥佬黎助手Mark Simon，與幾名友人上咗肥佬黎隻遊艇密斟四小時，莫非係為醜聞曝光諗計補鑊？
昨早上十時，一身黑超便服嘅李漢奸率先揸車駛往肥佬黎寓所，二人會合後隨即轉場至西貢嘅香港遊艇會，唔使問一定又上肥佬黎隻艇啦！李漢奸上船後當正自己屋企咁，直入船艙，而同場仲有Mark Simon、着藍衫嘅外藉男士，以及年紀較大、滿頭白髮、着綠色衫嘅中國藉男子坐定定喺船尾，五人「齊腳」後隨即呈「品」字形圍住圓枱密密斟。
傾足四粒鐘 再赴「白頂黑獄」
以往肥佬黎多數同「搞事四人幫」密會，藍衫老外同白髮男士反而少見，但五人中有三人都係醜聞主角，唔係為捐款醜聞「拆彈」都冇人信啦！五人傾足四個鐘，至下午三時先埋岸，連同藍衫老外嘅外籍老婆，一行六人分兩批落船。眾人落船後，李漢奸同Mark Simon依然雞啄唔斷，臨別前又同老外夫婦握手傾偈兼搭膊頭，表現得相當老友，又握手道別，六人再分四架車分道揚鑣。
肥佬黎同李漢奸似乎意猶未盡，當離開遊艇會後，李漢奸再跟肥佬黎車返「白頂黑獄」寓所，逗留多一陣先離開。至傍晚六時許，肥佬黎又揸車到李漢奸屋企，接載李漢奸去位於中環嘅上海總會飯店。肥佬黎一落車見有記者影相，竟然極速黑面話：「唔好咁狼，（影到）入升降機就夠喇！」反而李漢奸仲識笑笑口。
陳日君何俊仁李永達 現身飯局
原本以為只係二人撐枱腳，但佢哋食咗兩小時後離開嗰陣，先發現同屬「搞事四人幫」嘅天主教香港教區前主教陳日君、另一涉事主角民主黨何俊仁同李永達都係座上客，同埋佢哋胸口上戴多咗條黃絲帶添！究竟佢哋餐飯又係為捐款醜聞諗計補鑊吖？定係商討佔中部署呢？咁就只有佢哋至知喇！
卓妮