政情：收冒港大電郵 兩議員險上釣
網絡安全可以話係每個政治人物必須認識嘅議題，一不小心隨時被黑客「剝光豬」。好似立法會資訊科技界議員莫乃光（Charles）及人民力量陳志全（慢必），近日都收到一封假扮成「港大政治與公共行政學系」嘅學生電郵，話正製作「百大香港政治人物」專題網站，想佢哋click入去網頁，核對吓資料係咪正確喎。
Charles話晒係科技界人士，邊有咁易中招吖，一睇就知呢類係「釣魚電郵」，佢話如果就咁打開封郵件，都唔會出事，但通常電郵附帶一條link，如果click入去或輸入某啲資料就會中招，成個電郵信箱都會被黑客入侵。
Charles仲話，近期唔少同事都收到呢類「釣魚電郵」，有啲騙徒仲聲稱自己係「政府資訊科技總監辦公室」，又引佢睇外國女星艷照，似乎騙局經過精心設計，奉勸大家小心為上。