政情：政改爭議肥彭搞風搞雨
政改爭議白熱化，令一眾反中亂港牛鬼蛇神通通現形。中央早前先話有外部勢力干預香港事務，呢頭講完，外國勢力就即刻發功喺背後搞風搞雨。香港末代港督彭定康（肥彭）尋日高調喺英國《金融時報》撰文，批評英國冇為香港民主發聲，並譴責人大就香港普選嘅決定。而佢為咗表達英國交還香港畀中國係錯誤決定，毫無道德咁借香港一名精神病院嘅病人過橋，大讚該病人對香港前途問題「最清醒」，至於有冇呢個病人，真係得佢自己至知嘞。
頻厚顏跳出嚟扮好人
肥彭過主咁耐，久唔久就來港做騷搞搞震兼說三道四，現時仲發展到做時事評論員。尋日佢就揀喺英國報章撰文，透露自己卸任港督後一直迴避談論香港民主議題，係唔想令事情更為複雜，但近期眼見人大常委會定出政改框架後，覺得普選同「伊朗式選舉」差唔多，令香港出現政治動盪，又認為自己作為前港督，有需要提醒英國官員對香港事務發聲，尤其係英國政府有「道德及政治責任」，確保中方履行當年《中英聯合聲明》承諾。
可能肥彭都知道其他人會批評佢干預中國事務，所以特登話英國政府評論香港事務，係負責任表現，唔係挑釁行為，因為《中英聯合聲明》確保香港五十年不變，英國政府遲早都要就香港問題發表意見喎。就連英國政府都未作官方聲明，肥彭已經叻唔切跳出嚟講嘢，小心跟車太貼搞到車毀人亡呀！
之後肥彭愈講愈離譜，突然引用一個例子，話自己臨執包袱離港前探訪過一間精神科病院，其中一個男病人就問佢點解英國作為世界上最古老的民主國家，唔問香港人意見就將香港移交至一個政制完全唔同嘅國家（中國）手上，佢話聽到呢個問題好驚訝喎，呢個病人都唔知係唔係佢自己生安白造嘅。
肥彭突然發表謬論，工聯會兩大「元老級」議員王國興同黃國健都不約同炮轟肥彭說三道四。王國興話今次政改係香港內部事務，唔明白點解關英國人事，批評肥彭侮辱緊香港人智慧。黃國健就明寸肥彭，話佢用精神病人作例子非常合適，懷疑肥彭本身思路同精神病人好脗合，先諗得出呢個例子喎。
黃國健批評，全世界都有權評論香港政制事務，唯獨係肥彭無資格，因為肥彭管治香港咁耐，從來無幫港人爭取一人一票選港督，現時不時走出來扮好人，究竟佢知唔知個醜字點寫呢？
美國務院又干預港內務
除咗肥彭說三道四外，美國國務院又干預香港內部事務，一方面話支持香港依據《基本法》同港人願望舉行普選，同時又支持香港民主運動示威者，惟恐天下不亂。莫非正如我哋早前嘅推測，英國攞完中國三百億美元合約着數，美國又想分一杯羹？