中環出更：盧偉國彈琵琶 香港站大合奏
立法會工程界議員盧偉國（WK）除咗玩樂器耍家，仲不時四出表演娛樂大家。WK尋日就喺放工時間去咗港鐵香港站，與多名工程師合作演奏音樂。今次WK出動琵琶，兩位港鐵工程師杜朗賢及黎栢樺就分別負責拉小提琴及大阮，而港鐵副總監劉天成就演奏二胡，另外兩名工程師梁錦濤及關永強則分別主責洞簫及笙，眾人嘅演出為繁忙嘅港鐵站帶來輕鬆氣氛。
料創科局今年未能成立
立法會下月初復會，除咗要處理三堆一爐外，仲要審議創新及科技局決議案同撥款申請。雖然業界一直希望盡快成立創科局，但WK對此不感樂觀，事關人民力量陳志全及陳偉業合共就決議案提出三十二項「拉布式」修正案，加上佢哋仲可以喺財務委員會臨時提出多項修正案，所以估計新局無望喺今年內成立，惟有寄望兩人盡快放棄「拉布」。
此外，城規會即將會舉行聽證會，討論是否將原先納入科學園第四期嘅一幅八公頃地皮，改為中密度住宅用地。身兼科技園公司董事局成員嘅WK話，該地皮喺正科學園隔籬，對業界未來發展有莫大幫助，如果政府亂咁將塊地攞嚟起樓，勢必窒礙科學園未來發展。
卓妮