中環出更：青聯換屆啟剛冧莊主席
中秋節人月兩團圓，一家人歡聚食餐飯已係例牌動作。香港青年聯會（青聯）尋晚舉行新一屆就職禮，霍啟剛繼續冧莊做主席，卓妮同場仲見到青聯副司庫霍啟山及常務會董霍啟文，當然要問吓佢哋一家過節有冇咩與別不同啦！啟文話，原來佢哋以前中秋節除咗會燒祭品拜祖先外，細個仲會順便燒埋啲舊功課；至於啟山就貫徹本身嘅喜好，中秋節都掛住去踢波，當然兩人唔及啟剛多咗個囝囝陪過節咁開心啦！
啟山仲話，由於今年霍家多咗一個新成員第一次過中秋，所以即使佢哋十幾年冇玩過燈籠，今年可能會買番個送畀侄仔，等姪仔感受吓傳統中秋節係點樣。
狂掃燈籠與兒慶中秋
不過，啟剛就話自己已經買咗十幾個燈籠畀囝囝玩喇，仲連同無限父愛一齊送上。新任常務副主席范駿華就話，中秋都會同家人齊齊食團圓飯，享受家庭樂。
講到未來一年喺青聯嘅工作，范駿華就躊躇滿志，希望多啲同年輕人溝通，嚟緊會以十多人一組嘅形式加強與青年對話，將工作變得更仔細。
女成員喜事接二連三
至於青聯女成員方面，好消息接二連三，卓妮一口氣見到三位靚女一齊交換佗Ｂ心得，分別係即將於十一月生Ｂ女嘅成員梁煒茵、預產期明年一月嘅常務會董吳嘉汶及明年二月分娩嘅會董彭蘊萍。雖然懷孕時期要盡量遠離化學物，但三位女士化淡妝一樣明艷照人。
卓妮