全國人大常委會前日公布特首普選框架，泛民主派齊聲抗議，尋日早上仲去咗政制發展簡介會向人大常委會副秘書長李飛抗議。「民主阿婆」前政務司司長陳方安生唔知係咪嫌亞洲博覽館太遠，雖然獲邀都決定甩底，但係又不甘寂寞，尋日中午叫齊記者去中環香港會樓下發言幾分鐘。
民主阿婆話，框架喺任何角度睇都係壞透，批評特區政府喪盡市民信任，中央唔信香港市民。佢又話中央落晒閘，令溫和派方案都被拒，爭取普選無望，佔領中環必定發生。聽佢咁講仲以為民主阿婆會宣布參與佔中，點知佢被問到後即刻耍太極，話唔同人有唔同崗位，扮演不同角色，用唔同方法爭取普選，自己雖然支持佔中背後用意，但就唔會參與，會「精神上支持」。咁會扮演乜角色？民主阿婆淨係呼籲市民發聲，咁鬼使你喺度咩！