政情：「遠征」亞博 黃玉山過門不入
全國人大常委會副秘書長李飛早前南下深圳會見人大政協，港區人大代表黃玉山被抽中第一個發言，尋日李飛喺亞洲博覽館開政改簡介會，但就遲遲不見黃玉山蹤影，臨散場時先見到佢匆匆趕至。點知黃玉山一聽到個會就嚟完結，即刻轉身走人。山長水遠嚟到卻過門不入，唔通佢入大嶼山志在「行大運」？
黃玉山解釋話，尋日係大學開學日，佢身兼公開大學校長要主持開學禮先走得，所以咪遲咗囉。今年入讀公大的學民思潮黃之鋒尋日亦喺現場，唔知黃玉山事前有冇同佢溝通？或者一齊搭車走？一提到呢位惹火學生，黃玉山就耍手擰頭，唔想多講。
學民仔獲酒店退款
講起學民思潮今次示威原來唔使本。佢哋喺李飛來港前訂同一間酒店雙人房，然後安排五至六名「生面口」成員入住，原本諗住當面畀李飛抗議信，惟踩線期間保安見佢哋手持抗議標語，大家惟有提早發難。幸好經交涉後酒店肯全數退番幾千元房租，總算全身而退。