政情：峯鴿揀錯黨 爭選立會等劏
雖然今屆立法會任期仲有成兩年先結束，但各黨已經開始積極部署各區人選，務求搶到更多議席。民主黨（白鴿黨）喺一年前舉辦「政治領袖培訓計劃」，培育黨內生力軍進軍下屆立法會。有傳中西區區議員許智峯（峯鴿）趁白鴿黨最近進行第二階段招募，拿拿聲報名參加港島區新星計劃，企圖同其餘三位黨內新星爭選港島區。不過據聞黨內大佬唔係好鍾意許智峯借區議會出位嘅做法，睇嚟峯鴿最後都係陪跑居多。
三少壯派早已報名
峯鴿原本只係中西區一位寂寂無聞嘅區議員，今年初中西區區議會轄下嘅公民教育工作小組上，建制派同佢就是否開放會議予公眾旁聽一事發生爭拗，最後搞到報警收場，自此為人所認識。可能峯鴿以為鬧事就有得曝光，之後有理冇理就搞抗爭，令佢成為區議會另類「大紅人」。雖然峯鴿確實因此而廣為人識，但係佢嘅出位表現亦引起黨內大佬不滿。
港島區現時由單仲偕同甘乃威話事，兩人係黨內出名嘅溫和派，唔鍾意用激進抗爭手法吸引選民同傳媒眼球。前排區議會拒絕峯鴿提出「平反六四」議案，結果峯鴿就激動鬧事，搞到要畀保安強行抬走，同區嘅鄭麗琼即時同佢劃清界線，重申白鴿黨唔鼓勵黨員喺區議會用激進嘅手法表達訴求，令黨友同佢格格不入枱面化。
據講港島區三位南區區議員柴文瀚、羅健熙同區諾軒，一早已經報名參加新星計劃，加上三人都有一定形象及實力，如果白鴿黨真係要揀一個人參選立法會，有排都未輪到峯鴿。
自言「冇諗咁多嘢」
我哋問過峯鴿，佢承認已報咗名參加培訓計劃。佢話白鴿黨一直行中間溫和路線，覺得個黨可以再強硬少少，於是決定報名參加黨內甄選，睇吓有無機會代表白鴿黨參加立法會選舉。被問到黨友唔係好認同佢嘅激進行為，峯鴿就話冇諗咁多嘢。話時話，如果峯鴿想行激進路線，唔難搵到志同道合嘅黨派，做乜要夾硬嚟，搞到被黨友排斥咁慘呢？