中環出更：楊哲安月底迎第三條Queen
孕育唔少芭蕾舞界新星嘅香港芭蕾舞學會今年慶祝成立五十周年，早前逾二百位舞蹈學生聯同多位新舊舞者齊踏台板助興，舞出一幕經典舞劇《睡公主》慶祝，城中愛舞名人齊聚欣賞。教育局前政治助理楊哲安（Jeremy）湊埋兩個囡囡去睇騷，腹大便便的太太張新悅緊隨其後。被問到今個月底將迎接第三名千金出世，Jeremy笑言，唔介意家中有「三條Queen」，因為囡囡乖啲喎！
開騷前，卓妮見Jeremy突然拎出一盒叉燒包畀囡囡食，原來佢怕餓親囡囡，放工後急急買包畀家人醫肚。冇耐兩個囡囡嚷着要去洗手間，Jeremy見狀就帶佢哋去廁所，十足好爸爸。Jeremy應該要珍惜呢段時光，事關遲啲囡囡長大啲，都唔好意思帶佢哋入男廁喇！
名人賞舞劇 義賣助興
講番今次演出係由著名舞蹈家伍宇烈擔任藝術總監，美心新抱兼芭蕾舞學會主席伍曾慶寧（Helen）仲搵來台灣知名插畫師Ballet Monster設計海報及紀念品義賣。插畫師嘅筆觸細膩，將舞者喺華麗舞衣後嘅實況靈活呈現，製成一件件T-shirt、枕頭袋及眼罩等，Helen大手買入幾個枕袋，仲話要幫老公換埋枕套，齊齊發個好夢喎！
醉心芭蕾舞嘅名媛傅潔恩都一早來捧場。睇見班小妹妹舞姿動人，勾起佢唔少回憶。佢十二歲已參加學會演出，跳足四年。多年後佢嘅大女接棒，當晚仲上台演埋一份。
卓妮