人稱「騰雞美華」嘅民政事務總署署長陳甘美華自○三年「坐正」後，唔經唔覺已經接掌總署十一個年頭，總署一班聯絡主任除咗不滿佢唔走，尋日仲去信公務員事務局局長鄧國威，投訴總署「翻閹」兩位已退休嘅前總聯絡主任及前高級聯絡主任，更為兩人度身訂造合約制項目經理職位，矛頭直指陳甘美華喎！
投訴人不滿總署所謂招聘閉門造車，明益自己友，既無助長遠增加總署人手，仲窒礙聯絡主任內部升遷添！加上二人除咗每月穩袋退休金，仲逗埋新工份糧，有違《公務員事務規例》之嫌。投訴人又指控陳甘美華掌管總署多年仍不升不調，違反政務主任每三、四年一調嘅常規，質疑係咪另有內情。
不過，當局只係話調動政務職系人員時，會考慮部門同政府運作需要，唔同職位任期都唔同，唔評論個別職位安排。總署就為翻閹風波解畫，指兩個職位均屬臨時性質，而兩人都經公開招聘，唔係以公務員條款聘任，唔會影響聯絡主任內部升遷喎。