九龍灣：專線小巴擅改道惹不滿

專線小巴擅自縮短路線，惹起乘客不滿！在九龍灣工作的鄧先生發現，往來九龍灣與順利48號專線小巴有司機疑為節省時間，未按指定行車路線途經MegaBox分站。「喺朝頭早同傍晚嘅繁忙時間成日都係咁，明明嗰度有分站但就唔入去，點解運輸署冇人理？」

運輸署發言人指，約見有關專線小巴營辦商後，獲覆已訓示所有司機須按行車路線行駛。該署其後在早上繁忙時段派員實地突擊調查，發現仍有少數司機出現上述問題，已向營辦商發警告信。經覆查後沒有發現違規情況，該署會繼續監察該線小巴的情況並適時跟進。

「專線小巴有晒指定路線，唔應該隨便話改就改！」鄧要求運輸署加強監管該線小巴服務，確保小巴按既定行車路線行駛。