古人話，「有朋自遠方來，不亦樂乎」，家陣應該改成「有客自遠方來，不亦憂乎」。事關訪港旅客愈來愈多，而旅遊設施遠遠追唔上需求，尤其係酒店房間供不應求，搞到無牌賓館遍地開花，亂象叢生。
本港究竟有幾多無牌賓館呢？有團體調查發現，目前本港酒店未能吸納嘅「旅客吞吐量」高達六百九十萬晚酒店房次，如果呢啲旅客全部入住賓館，可以推算出無牌賓館超過二千二百七十間，相反持牌賓館只有八百六十間，即係話平均每四間賓館就有三間屬於無牌。好似登打士街咁，短短二百米就有十六間賓館，其中七間無牌，問你怕未。該團體估計，營運一間過千呎嘅賓館，每月收入可高達二十一萬元，都幾和味o架。
由於無牌賓館佔用民宅，導致房屋短缺問題雪上加霜，團體建議政府重新檢討酒店用地政策，限制旅客數量咁話。其實，呢啲建議完全冇新意，只不過係老生常談。正所謂，殺頭生意有人做，蝕本生意無人做，無牌賓館之所以成行成市，皆因有利可圖。睇吓數字就知，去年訪港旅客人數多達五千萬，預計三年後增至七千萬，好快更會突破一億添。面對旅客不斷增加，港府乜都唔做，搞到旅遊配套設施嚴重不足，目前全港酒店房間只有七萬多個，兩年後亦只會增加九千個咁大把，根本不成比例，無牌賓館唔愈開愈多就奇嘞。
係人都知，無牌賓館多數開喺舊樓，將有限空間分間成狹窄客房，唔止環境惡劣，而且危機重重，旅客安全毫無保障。呢，去年北角五洲大廈發生奪命火警，一名新加坡遊客無辜喪命，再次為無牌賓館嘅安全問題敲響警鐘。最離譜嘅係，奪命火警發生後，該大廈仍有疑似無牌賓館明目張膽經營，你話問題嚴重到乜嘢程度吖！
其實，莫講話無牌賓館危機四伏，就算係持牌賓館一樣問題多多。事關當局發牌求求其其，只要單位符合《建築物條例》及《消防條例》就自動批出牌照，來者不拒，就算大廈公契不容許經營旅館，當局一樣照批不誤。住宅與旅館混雜於同一大廈之內，唔止品流複雜，而且危機重重。
講到底，賓館問題多多，責任根本喺港府身上。一來當局冇監冇管，放任自流；二來當局漠視旅遊設施配套不足，又唔想辦法增加酒店供應，無牌賓館梗係野火燒不盡，春風吹又生啦。
直至最近，當局先至姍姍來遲計劃修訂《旅館業條例》，收緊賓館發牌條件，掃蕩無牌賓館，仲話會盡快增加酒店用地喎。嗱，遲到好過冇到，千祈唔好得個講字吖，否則遲早又爆大鑊嘅咋！