政情：駱英棋回憶「漂手寫琴譜」
青年廣場趁八月學生放暑假，舉辦「漂書節」，提供一個平台畀大家將睇過嘅書擺低，「漂流」到其他人手上再閱讀。香港口琴協會董事會主席駱英棋（Rocky）都有出席活動，講起書本漂流，佢就話琴譜都可以經常漂來漂去，佢記得讀中學時，連口琴都會借畀同學添！
對一個學樂器嘅人嚟講，平日對得最多嘅好可能係樂譜。Rocky話，佢讀書嗰陣電腦未普及，好多時吹口琴用嘅譜都係自己聽完手寫出來。佢仲話，為求方便，大家寫好嘅樂譜都會互相傳閱或借用，但有時份譜漂漂吓都唔知漂咗去邊，尤其隔咗個暑假，就更加難追回喇，所以一定要記低借咗畀咗邊個。
唔介意老友互借口琴用
Rocky指當年同學之間借樂器好平常，有時啲人借完仲可能未洗過就還番畀佢。用口接觸嘅樂器借畀人用咪好污糟？但佢話大家咁老友就唔緊要，最多洗番乾淨啫，但其他唔熟嘅人就唔好借喇。