我哋早前報道過，政圈中人發現環境局局長黃錦星（星星）、副局長陸恭蕙及政治助理區詠芷三人有一大盲點，就係冇人識同建制派打交道同拉票，加上早前先後「甩轆」發生終止待續及否決活化已復修堆填區計劃同小蠔灣廚餘回收中心，星星最近亡羊補牢，急急約見各大建制派食飯，「補鑊」味道極之濃厚。
綜合各方消息話，星星「補鑊」頭炮係約見工聯會，除咗為「三堆一爐」拉票外，又主力解釋廚餘回收中心被指造價過高等課題，緊接其後係約會民建聯。據聞星星陸續約食飯「拜票」，似乎想表達一票都不能少嘅訊息。
至於被視為建制反對派嘅自由黨，據聞喺星星被資深建制派當面批評嘅報道曝光後一、兩日，佢隨即提出同該黨於下月食飯溝通交流。話時話，星星連串密集食飯就食得多，但講到底都要同建制派建立戰略合作夥伴關係，否則次次出事先至拉票，都唔拉得幾多次，萬一再發生大單嘢「甩轆」，佢真係隨時「收工」唔使再拉票喇！