政情：白鴿扮激 擬滴血撐佔中
人大常委會制訂政改框架在即，喺立法會手持六票嘅民主黨（白鴿黨）日前先獲中聯辦主任張曉明擺頭圍接見會談，本周四仲會上深圳會見基本法委員會主任李飛等京官，反映有票在手嘅老鴿口裏說不，但始終都想同中央有偈傾。不過，經過一○年同中聯辦密室秘談而背負投共污名足足四年，白鴿黨始終猶有餘悸，惟有今次北上前諗計扮激進，好似尋晚嘅佔中演練，甚至最終胎死腹中嘅「滴血為盟」，都係想通知大家該黨未被統戰啫！
白鴿黨有望轉軚絕對有迹可尋，好似佢哋由開初堅持公民提名，到後來三軌提名甚至近日再改口，降價要求特首普選「冇不合理限制」，都反映該黨不斷釋出善意。而老鴿李華明早前另組「政改民意關注組」力撐「袋住先」，開闢溫和泛民主派戰線；另一老鴿吳永輝亦簽署由建制派牽頭嘅聯署聲明，呼籲各界尋求共識，可見該黨喺政改議題上絕對有偈傾。
圖顯不再密室談判
不過，白鴿黨見過鬼肯定怕黑，為表心迹唔會再玩密室談判，黨內一直步步為營，好似早前喺中環舉行佔中宣誓，就反被人民力量踩場抗議。
黨內甚至有人提議學古人咁「滴血為盟」，以示對佔領中環行動（佔中）嘅忠誠，但有元老嫌滴血太血腥又唔衞生，呢場滴血戲碼先告作罷。不過，當佢哋嘅屎橋用得七七八八時，會否重提「滴血為盟」嘅建議，實在好難講。
演練佔中似交差騷
由於北上在即，佢哋尋晚就臨急臨忙搞咗個佔中工作坊，演練佔中嗰陣被警方清場抬走嘅情況，但只係求其搵乳鴿區諾軒同林卓廷湊數示範，似係圍威喂搞場大龍鳳多啲喎。不過，該黨做場騷擺明車馬係虛張聲勢，想話畀大家知該黨未被統戰o架，一樣隨時響應佔中，要幾激有幾激。究竟係咪擺晒下台階白鴿黨都唔肯華麗轉身，就要睇深圳之行傾唔傾得掂數喇！