中環出更：陳恒鑌淋冰桶 點名挑機
為咗幫「肌肉萎縮性脊髓側索硬化症」患者籌款，喺美國熱傳到香港嘅「淋冰桶挑戰」，最近有唔少政界人士都加入行列。尋日就到立法會議員陳恒鑌（Ben）將成桶冰水照頭淋，仲指名挑戰三政界人士，包括黨友何俊賢、佔中三子之一嘅戴耀廷及將政治捐款「袋住先」嘅工黨李卓人，唔知三位人士能否於廿四小時內接受挑戰呢？
由於挑戰者可要求被挑戰者向邊間機構捐錢，阿Ben就先叫何俊賢捐錢畀紅十字會，幫助雲南地震災民，唔捐就要淋冰水。至於第二位被挑戰嘅戴耀廷，阿Ben就話戴叫細路參加佔中犯法，真係要用冰水淋身諗清楚至好做喎。不過，戴耀廷由頭到尾講明佔中要十八歲以上至參加得，阿Ben似乎有少少抽錯水囉。
而第三位被挑戰人士就係阿人，阿Ben諷刺佢收咗壹傳媒老闆肥佬黎政治捐款，應該淋一淋身諗下仲有無「袋住先」喎。阿Ben向何俊賢挑機後，何隨即喺旁晚淋冰回應，又向另一黨友陳克勤下戰書，睇嚟呢個挑戰真係沒完沒了。
卓妮