港產官僚成日恐嚇市民，話堆填區就嚟滿瀉，垃圾圍城危機迫在眉睫，結果好嘅唔靈醜嘅靈，垃圾圍城可能好快就出現，香港隨時淪為臭港！
係咁嘅，將軍澳堆填區臭味問題長期困擾附近居民，環境局為咗推銷擴建計劃，舊年提出廢物分流建議，將軍澳堆填區最快明年首季起停收家居廢物，每日近二千噸垃圾將會由西九龍同沙田廢物轉運站接收，而為咗騰出處理空間，家陣用緊呢兩個轉運站嘅部分承辦商，就要將垃圾轉移到柴灣、摩星嶺及小蠔灣三個轉運站，經壓縮後再運到另外兩個堆填區。
呢招垃圾「乾坤大挪移」好似好有效，其實只係挖東牆補西牆，根本無助解決問題。嗱，家陣計劃未正式開始，唔少西九龍轉運站附近嘅居民已經投訴臭味滋擾，日後真正實行，居民仲唔嘈到拆天咩。有立法會議員擔心，分流計劃好似「垃圾大旅行」咁，污染問題可能會隨垃圾車擴至全港。所以話啫，垃圾圍城唔係杞人憂天o架。
再講喇，家陣轉運站已經超負荷，根本承受唔起分流後增加嘅垃圾。表面上，現時全港轉運站使用率約為九成三，好似仲有使用空間，但正如業界人士踢爆，轉運站嘅剩餘容量主要集中喺非繁忙時段，早上或傍晚入站嘅垃圾車根本用唔着，再接收額外垃圾，隨時爆煲都似。呢，兩個轉運站早已應接不暇，搞到垃圾車經常大排長龍，隨時要排兩個鐘至入到去。你知啦，家陣大熱天時，大批垃圾車排長龍，臭氣熏天事小，傳播惡菌散布病毒事大，唔係講玩o架！
仲有吖，將軍澳堆填區係免費嘅，而廢物轉運站處理每噸垃圾就要收三十元，業界估計，轉用轉運站成本至少增加四成。唔使問阿貴，羊毛出在羊身上，呢啲成本一定會轉嫁畀市民，如果二○一六年落實垃圾徵費，業主分分鐘面臨「雙重徵費」，到時唔怨聲四起至奇。
講嚟講去，垃圾問題之所以尾大不掉，皆因港產官僚冇做好份工。好似擴建堆填區咁吖，大家都知道再拖落去，香港隨時變成「垃圾港」，弊在港府做嘢甩甩漏漏，加上社會泛政治化，有人為反對而反對，搞到「三堆一爐」騎虎難下，進退兩難。試諗吓，港府長期推動環保不力，無論強制分類抑或源頭減廢，統統得個講字，一味攤大手板問市民攞錢，又點會令人服氣呀！
一句講晒，官僚估錯數，香港冇運行，垃圾圍城已經唔係狼來了，而係就快殺到埋身嘅噩夢！