○七年即出任香港特別行政區財政司司長嘅曾俊華，在美國受大學教育，八二年十一月回流返港，加入香港公務員行列，自此，仕途一帆風順。
呢位人謂「鬍鬚曾」嘅財爺，自稱「我都係中產」，月入四十萬，鍾意食熱辣辣嘅蝦餃，平日喜歡喝咖啡及看法國電影，話自己同香港大部分中產嘅生活無大分別。有學者指出最近中產階級呈兩極化的趨勢，日子不易；有人就曾戲謔，不要在中產社區售賣名牌衣服，因為他們有太多投資項目，一般沒有多少餘錢！之不過，如今中產，猶幸上咗樓嘅，睇怕都要為供樓節衣縮食，相信冇鬍鬚曾咁優閒地食熱辣辣蝦餃、歎咖啡和看法國電影！
日前，鬍鬚曾又發表《青春無悔》網誌，認為理想與現實並非二元對立……其實大部分情況都是「為拗而拗」，毫無意義。
當然，以鬍鬚曾每年一味靠估嘅「財政預算」，加上年年欠缺長遠規劃嘅經濟報告，香港有乜風吹草動，只知道賴「外圍因素」，提出「預警」，咁就年年大吉，好官我自為之。咁嘅「中產」高官，何止對青春無悔，今生都死而無憾喇！講真，身處財金高官，鬍鬚曾究竟為香港嘅民生、社會做過乜嘢貢獻？理財哲學「應使則使」四字走天涯，香港大量資金儲備，有冇好好運用？何以經濟轉型永遠是紙上談兵？何以樓價愈遏愈飆高？何以要不食不用十四年才可買個劏房困住自己？事實是大部分年輕人對青春有悔！
《戰國策》有一則「田子方諫文侯」，田子方說賢明的國君，心思都放在國事上；不賢明的國君，心思才放在吹打彈唱上。魏文侯精通音樂，對於國家政事，恐怕就不會怎麼精明。今鬍鬚曾一味敏於寫網誌，發吓廢噏，講吓「中產」閒適之道，香港經濟，唔繼續低迷有鬼咯！