政情：教聯副主席入黨謀戰區選
明年區議會選舉在即，各大政黨都滿腹大計，希望盡量擴大版圖加強勢力。尤其係一啲有專業背景嘅年輕人，特別受到政黨青睞。好似教育工作者聯會副主席王惠成最近就加入咗新民黨，據聞佢仲積極考慮出戰明年嘅區議會選舉。
王惠成做咗幾年教聯會高層，喺教育界都有少少知名度，但係喺政壇唔算出名，現時加入政黨，唔通佢劍指教育界功能組別？聽聞教聯會最終派咩人出選功能組別未有定案，反而王惠成好似對地區直選興致勃勃，明年仲積極考慮出戰區議會選舉添。
本身係中學教師嘅王惠成祖籍福建，由細到大都住喺北角，如果明年區議會選舉成功喺港島東區取得席位，分分鐘可以一石二鳥，既幫新民黨箍實福建幫票源，亦可以壯大教聯會喺地區嘅影響力，呢個如意算盤抵諗喎！