政情：民主阿婆歪理教壞人

尋日「民主阿婆」喺佢做召集人嘅「香港2020」記者會上批評，前日嘅「八．一七和平普選大遊行」中有人懷疑收錢遊行，佢話︰「係咪應該畀市民有真正嘅選擇呢？而唔係透過畀錢啦，安排好多其他應酬節目，先可以游說市民上街表態呢？」仲話佢自己對呢樣嘢非常反對，覺得係侮辱咗香港人嘅智慧。

回應醜聞唔耐煩

「民主阿婆」仲對人哋搞遊行意見多多。佢質疑有關團體咁大陣仗搞反佔中，又話過往都有民意調查顯示大多數市民反佔中啦，點解今次要咁大費唇舌、咁多動作去搞遊行咁話。如果咁講，都有唔少民意調查話市民支持普選啦，咁泛民使乜成日搞遊行示威、「佔領中環」呢？

「民主阿婆」講完一大堆歪理，但一被問到收肥佬黎錢一事就左閃右避，仲反問︰「你講一講咩叫收錢先？」不過佢就承認有去信銀行機構，要求佢哋解釋「抽起」肥佬黎壹傳媒集團旗下報紙廣告一事。當被追問究竟「香港2020」嘅經費同肥佬黎是否有關時，「民主阿婆」就唔耐煩話︰「我係答咁多，你點問我都係答咁多，我建議你唔好再問喇！」

泛民支持度俱跌

另外，香港研究協會今個月做咗個市民對香港主要政治團體支持度評分嘅調查，發現幾個被揭發收受肥佬黎捐款嘅泛民政黨支持度評分都下跌，跌幅最大嘅係公民黨，而涉接收捐款嘅泛民政黨中，民主黨同工黨嘅跌幅就僅次於公民黨，分別排第二同第三。