中環出更：陳茂波巡沙頭角似行山
本報曾喺上月報道政府部門各自為政，遊客要前往沙頭角荔枝窩地質公園「關卡重重」，只能經迂迴山路步行兩小時，或經水路於沙頭角禁區包船前往，導致呢個世界級地質公園極少訪客。事有巧合，發展局局長陳茂波（阿Paul）早前現身沙頭角，同行仲有規劃署署長凌嘉勤，唔知阿Paul係咪亡羊補牢，拉大隊微服出巡，諗吓補救辦法呢？
凌嘉勤打扮似村民
有沙頭角居民向卓妮報料，話阿Paul上周六微服到訪沙頭角。當時阿Paul頭戴鴨舌帽，身穿間條恤衫巡視沙頭角多個地點，見到有村民行過，仲舉起右手打招呼。同行凌嘉勤一身打扮仲入戲，佢穿有領T恤，揹住背囊，頸上仲掛住條毛巾，打扮好有村民Feel。佢哋成班人打扮似足去行山，唔講仲以為係趁周末去戶外消遣嘅市民添！
話時話，早前立法會喺爭議聲中通過新界東北發展計劃前期工程撥款，阿Paul終於可以鬆一口氣，趁暑假抖吓，充飽電再搏殺過。
卓妮