中環出更：內蒙來港招商 王敏剛掃公仔
內蒙古嘅塞外風光令人嚮往，唔少政商界人士都有奇趣嘅回憶。早前內蒙古嚟香港舉行招商活動，好多城中名人去撐場，包括港區人大代表王敏剛（Peter）、中華總商會永遠名譽會長蔡冠深（Jonathan）等，冇去過內蒙嘅華懋集團主席龔仁心亦同佢家姐龔中心一齊現身。眾人講起住蒙古包、大啖食肉飲酒嘅豪邁文化，回味無窮。
中文大學工程學院副院長黃錦輝話，佢曾隨資訊科技界好友去內蒙四、五次，亦曾試過同太太一齊去旅遊。去到蒙古梗要住蒙古包，而今時今日好多外形似蒙古包嘅酒店，其實係用石屎興建，但黃錦輝就好好彩，曾住過環境簡陋嘅傳統蒙古包，體驗夠晒真實。一場嚟到，又點少得去當地著名連鎖火鍋店打邊爐，不過侍應一嚟到就問佢哋係咪一人要一斤肉，嚇咗佢哋一跳，深深體會蒙古人真係大啖食肉嘅民族。
卓妮轉頭見到Peter喺一個展銷攤位上買嘢，原來佢被穿上蒙古衫嘅公仔吸引，一口氣買咗十幾隻。Peter笑笑口話，佢喺內地推動動漫文化，好似佢喺絲綢之路沿線投資唔少酒店，每間酒店都以反映當地獨特文化嘅公仔做吉祥物，所以當日買公仔純粹係想帶返去畀動漫部同事參考。講到起酒店，Peter話佢曾經計劃喺內蒙建傳統蒙古包酒店，即蒙古包放喺牛車上，可惜最後因為取得土地唔夠大而擱置。
蔡冠深買市政府前大樓
同場嘅Jonathan喺內蒙都有生意，包括喺通遼市投資房地產，仲買埋當地「市政府大樓」添。市政府大樓都買到？Jonathan笑稱，係市政府前大樓至啱。
卓妮