孔夫子教落，君子不立危牆之下。今日香港，呢句話可以改為「君子不立危樹之下」。嗱，前日港島半山發生塌樹殺人事件，一名孕婦被擊中喪生，腹中BB仍然危殆，令聞者心酸。
正所謂，三分天災，七分人禍。今次事件表面上係天降橫禍，防不勝防，實際上係當局護樹不力，立法拖拉埋下嘅禍根。
唔講唔知，本港七○年前落成嘅舊契屋苑，並無保養樹木條款，如果發現樹木有問題，只係由地政總署向業主發出警告信，要求加強管理。最離譜嘅係，當局一味以行政手段要求私人業主管理樹木，就算對方置之不理，當局亦無可奈何。有樹藝專業人士踢爆，根據樹木辦指引，修剪樹木需由合資格承辦商負責，問題係樹木保養非常專業，經常要出動掌握攀爬同用鋸技術嘅註冊攀樹師，好多承辦商根本冇咁嘅能力；再講吖，多數業主立案法團以價低者得方式請人修葺樹木，一分錢一分貨，結果咪問題多多囉。
聽吓當局點解畫吖喇。發展局官員承認，喺慘劇發生前，當局未掌握倒塌嘅印度橡樹健康情況，更加唔知全港私人土地上有潛在風險的樹木總數。即係話，當局對私人屋苑樹木係「零監管」，唔出事至奇喇。
冇錯，今次慘劇喺私人地方發生，業主可能要承擔主要責任，不過咁，樹木安全涉及市民生命安全，當局責無旁貸，好似僭建招牌或者消防隱患咁吖，即使位處私人物業，當局一樣有權責令業主進行整改，人命關天，點可以闊佬懶理o架！
話時話，自幾年前赤柱塌樹壓死女大學生事件後，要求港府就護樹立法嘅呼聲一直不斷，可惜你有你講，佢有佢拖，到依家仲係無聲無息。發展局最新嘅解釋係，立法涉及規管私人土地嘅樹木管理工作，亦要考慮人力資源問題，事關本港○五年至有首位註冊樹藝師喎。計功夫茶話齋，呢啲都係藉口啫，其實早喺十年前已經有學者向港府提交樹木法草擬稿，如果港府當時把握時機，積極培訓相關人才，相關法例可能早就出籠，塌樹殺人悲劇就唔會一而再再而三發生喇。
講到底，世不患無法，而患無必行之法。港產官僚護樹甩漏多多，烏龍百出，悲劇層出不窮，即使推出樹木法都未必能夠清除安全隱患。始終都係嗰句，官僚靠得住，豬乸會上樹，香港遍地都係都市炸彈，危機四伏，市民最好自求多福，千祈唔好立於危樹之下呀！