財政司司長曾俊華（鬍鬚曾）日前撰寫網誌，預警第二季香港經濟加速放緩，又話連同外圍經濟同政局不穩、本地嘅政改爭拗等，隨時會引發一場「完美風暴」，吹冧香港經濟同股市樓市，但當時冇乜市民認真看待，以為佢又玩「狼來了」伎倆，純粹為政府「開刀」緊縮開支造勢鋪路。直到尋日政府正式公布第二季經濟數據，結果果然好差，不但按季錄得負增長，仲罕有地一次過調低全年增長預測一個百分點。鬍鬚曾講真話冇人信，皆因過往講太多「狼來了」，點知今次嚟真，佢真係要好好檢討吓。
